स्याङ्जा,६ असार– जिल्लामा निषेधाज्ञा थप गरिएको छ । आइतबार जिल्ला प्रशासन कार्यालय स्याङ्जाले एक सूचना जारी गर्दै यस अघि कायम रहेको निषेधाज्ञालाई बढाएर असार १५ गते सम्म पुर्याइएको जनाएको छ । गत वैशाख २१ गते देखि सुरु भएको निषेधाज्ञा कोरोना संक्रमणकाे जाेखिम जिल्लामा कायमै रहेकाेले थप गर्दै लगिएको हो ।

प्रमुख जिल्ला अधिकारी दिपकराज नेपाल द्वारा जारी गरिएको निषेधाज्ञामा जिल्लामा अझै पनि संक्रमणको जोखिम कायम रहेकोले संक्रमण रोकथाम र नियन्त्रणको लागि नेपाल सरकार मन्त्रीपरिषद्को २०७८÷०१÷१३ को निर्णय तथा जिल्ला सुरक्षा समितिको निर्णयसोतका आधारमा संक्रामक रोग ऐन, २०२० को दफा २ र स्थानीय प्रशासन ऐन, २०२८ को दफा ६(३)ले दिएको अधिकार प्रयोग गरी असार ७ गते राती १२ बजेदेखि असार १५ गते राती १२ बजे सम्म जिल्ला भर निषेधाज्ञा निषेधाज्ञाको आदेश जारी गरिएको छ ।

निषेधाज्ञाको अवधिमा प्रशासनले तोकेका बाहेकका अन्य कार्यहरु गर्न पाइनेछैन भने अत्यावश्यक कार्यहरुमा प्रयोग हुने एम्बुलेन्स लाई भने अवरोध गरिने छैन । बैंक तथा वित्तिय संस्थाका सेवाहरु स्वास्थ्यका मापदण्डहरुको पूर्ण रुपमा पालना गरी सञ्चालन गर्न पाइने छ भने कामदार एवं सुपरभाइजरहरु यथास्थानमा रहेर विकास निर्माणका कामहरु समेत स्वास्थ्य सुरक्षाका उपायहरुको पालना गरेर सञ्चालन गर्न सकिने छ। यसै गरि निजि सवारिसाधन जाेर बिजाेर नम्बरका अाधारमा सञ्चालन गर्न सकिने जिल्ला प्रशासन कार्यालय द्वारा जारी आदेशमा उल्लेख गरिएको छ ।